Fetaulaki moe kau to’a ‘oe tuku ifi

Reverend Sione Nisani Tolu

 

Na’e talu pe ‘eku ifi ia ‘a’aku mei he ‘eku kei lautohi ta’u onongofulu tupu ‘alu ai pe ‘ou hu ki he Kolisi ko Tupou na’a ku ‘osi ifi tapaka pe au ia. Na’e malanga’i lahi mai ‘ehe kau faifekau tokolahi ‘a e kovi ‘a e Tapaka ka na’a mau kumi ‘uhinga pe ki he kau faifekau ko ‘eni ‘o pehe ‘oku ikai ke ta’ofi ha taha ifitapaka ia mei Hevani. Aʻu ‘o mahu’inga ange ke to’o ‘a e kofu tapaka ia mo e pooti ki falelotu kae ngalo Himi ia mo e Tohi Tapu. 

Na’a ku fe’ao moe tale lahi ‘aupito ‘o a’u ki he taimi na’e ui ai au keu ‘alu ‘o fai ‘a e ngaue ‘a e ‘Eiki ki he ngaahi kolo ‘oku ou lolotonga tokoto falemahaki au he tale lahi faka’ulia mo’oni. Na’e kamata heni keu feinga ke tuku eku ifi ka na’e fu’u fai ngata’a ‘aupito.

Na’e kamata mahina1 mahina 2 ‘osi pe toe foki pe au ‘o ifi aʻu ki ha taimi kou ongo’i ai ‘oku ‘ikai ke ‘iai ha ivi ia ke ta’ofi ‘aki ‘a ‘eku u’a ‘o e tapaka. Ka na’e aʻu ki he 2001 na’a ku kole ai ki he ‘Eiki kene tokoni’i au ke ta’ofi au mei he u’a ‘o e tapaka. Pea talu mei ai ‘a hono liliu ‘ehe ‘Eiki ‘o to’o meiate au ‘a e u’a ki he tapaka.

Pea ‘oku ou ‘ako’i ki ai ‘eku fanau pea ko e ‘api fakasiasi kotoa pe ‘oku ou fononga ai ‘oku ou ta’ofi ia ke ‘oua ‘e fai ha ifi tapaka ai. Pea koe me’a ia ‘oku ou tui ki ai ka ‘oku ‘iai ha me’a ‘oku lelei tau nga’unu ki ai.

 

Fusi Kaho

Na’a ku ifi tapaka pe hili ‘a ‘eku ‘osi mei he ako ‘i he ta’u 1973. Ko au pe ia na’a ku ifi lahi taha ‘i ho mau famili. Na’e a’u ‘ou palomesi loi ki he ‘eku tamai he na’a ne totongi’i ‘aki au ‘a e US $1000 ke tuku ‘eku ifi. Ka na’a ku kei ifi pe. Na’a ku fu’u vaivai ‘aupito pe au ia ki he tapaka. 

I he ‘aho 29 Tisema 1999 ‘i he teuteu ki he Senituli fo’ou na’e to’oa ai hoku loto ‘i he malanga ‘a e faifekau ‘i he teuteu ki he Mileniume fo’ou. Ko ‘ene kaveinga koho tau sino koe Temipale ‘a e ‘Otua. Pea na’a ku fakakaukau ait a ‘oku ou tutu ‘aki ‘a e tapaka ‘a e Temipale ‘a e ‘Otua mo hono ‘afio’anga.

Mei he 29 ‘o Tisema 1999 ki he ‘aho ni ‘a ‘eku ongo’i tau’ataina mei he ha’i ‘a e tapaka. ‘Ikai ke lau ha taha ki he mole faka’ekonomika he fo’i sikaleti ta koaa ‘oku feau pe fiema’u ia ‘a e famili ka na’e mole silini lahi ia he kumi ‘aki ‘a e fo’i sikaleti. 

ʻI he tuʻunga ʻoku ou ʻI ai he taimi ni ʻoku ou fakafetaʻi lahi ki he ʻEiki he taimi ko eni ʻeku moʻui kiate ia ʻoku ne tokoniʻi lahi au ke tuku ʻaupito ʻeku ifi.  Oku ou toe moʻui lelei ange he taimi ni pea hange ko ʻeku ngaue he taimi ni kuo u aʻu eni ki hoku taʻu 60 ka ʻoku toe fakaloloa atu ʻeku taimi ngaue mo e potungaue.  ʻI he tuʻunga moʻuilelei ʻoku ou aʻu kiai he taimi ni ʻoku ou kei lava pe ʻo fai e fakamalohisino pea ʻoku tokoni lahi ia kia au mo ʻeku moʻui lelei he tuku ʻeku ifi tapaka.

Ko ia ai ‘oku ou pole’i kimoutolu Tonga ko e tuku ifi tapaka ko e me’a lelei mo’oni ki he sino, famili mo e fonua.

Taukatelata Vakalahi

 

Ko au na’a ku toki ifi pe ‘i he ‘eku fononga ki he inu kava, ko e taimi kotoa pe ‘oku ou inu kava ai kuo pau pe keu ifi ha fo’i tapaka. Ko e tangata hiva au mo tame’a ‘i he inu kava ka na’a ku fakatoka’anga’i ‘oku ‘alu pe taimi ke hange ‘oku nou nou ‘eku manava.

Na’a ku ifi au ia mei mei puha kakato tapaka kakato ‘e taha he ‘aho. Pea na’a ku toe fakatokanga’i mo e me’a ‘e taha ko e lahi ko ia ‘eku fakamole ke kumi ‘aki ‘a e fo’i tapaka. Pea ‘i he ‘eku fakaukau atu ki ai he taimi ni mahalo koe ‘osi ha ta’u ‘e 1 meimei ki he 4 afe tupu ‘a ‘eku fakamole ‘ata’ataa pe ki he fo’i tapaka.

Pea ‘ai ai ‘a e ‘ikai ke fu’u lelei ‘a e ki’i vahe ‘oku ou fakakaukau atu au ia meimei ko e 70% ia ko ‘eku fakamoleki ia ‘e au ki he tapaka ‘ata’ataa pe pea toki mei ai meimei ko e 25-30% pe ‘oku ‘oange ki hoku ki’i famili.

I Sepitema 2015 na’a ku tokoto falemahaki ai ko ha palopalema na’e hoko ki hoku ihu pea na’e talamai ai ‘ehe toketaa ‘oku tokoni lahi ‘aupito ‘a e tapaka ia ki he maumau ‘oku hoko ki hoku ihu.

Na’e a’u ‘o mahina ‘e 1 ‘eku tokoto falemahaki pea ko ‘eku ‘ataa pe ko ia ‘o fakapapau’I ai pe ko ‘ene ta’ofi ai pe ia ‘a ‘eku ifi tapaka.

Ko e tuku ko ‘eni ko e tuku fakafokifa pe ia pea na’e ‘ikai pe ke ‘iai ha fa’ahinga me’a ia kene toe faka’ai’ai au kei toe ala ki he tapaka a’u ki he ‘eku ‘alu ki he kava tonga ‘oku ifi mai hoku kaungaa kava tonga na’e ‘ikai pe teu toe fie ifi au ia.

‘I he taimi ni ‘oku ou ongo’i mo’ui lelei ‘aupito pea ‘oku toe leilei ‘aupito pe ‘eku manava. Pea ‘oku ou tui au ko e ifi tapaka ko e fo’i fakamole ‘ata’ata pe ia ‘a kita ki he ‘ahu taumaiaa ‘oku ‘iai ha lelei ia ‘e ma’u ai, kia kita mo hoto famili ko e ifi tapaka ia ko e fo’i fakamole noa’ia pe.

  • YouTube - Grey Circle

​An initiative of the Tongan Ministry of Health with the support of the Tonga Health Promotion Foundation, the Australian Government and the World Health Organization.